Ambasada amerikane në Tiranë ka reaguar pas votimit në Kuvend të ndryshimeve Kushtetuese për zgjatjen e mandatit të organeve të vetingut.
Në një mesazh në Facebook, ambasada e ka cilësuar këtë moment si një hap të rëndësishëm për të gjithë shqiptarët
Ky vendim, sipas SHBA-së, do të na çojë drejt një sistemi drejtësie më të fortë dhe më të besueshëm duke i hapur rrugë integrimit europian.
Postimi i ambasadës amerikane:
Shtetet e Bashkuara përshëndesin miratimin e zgjatjes së mandatit të vetingut në Parlament. Ky është një hap i rëndësishëm përpara për të gjithë shqiptarët – drejt një sistemi drejtësie më të fortë, më të besueshëm dhe drejt integrimit europian. Shtetet e Bashkuara do ta mbështesin gjithmonë Shqipërinë përgjatë kësaj rrugë të rëndësishme.
Më herët miratimin në Kuvend e kanë përshëndetur dhe ambasadorët e BE-së dhe Gjermanisë. Ata e kanë cilësuar këtë një vendim të rëndësishëm që do t’i hapë rrugë Shqipërisë drejt integrimit në BE.
Parlamenti miratoi me 118 vota pro, 0 kundër dhe 4 abstenim, ndryshimet Kushtetuese për zgjatjen e mandatit të organeve të vetingut.